Theindependent - 'හලාල්' ලේබලය කිසිම නිෂ්පාදනයකට හෝ ව්යාපාරික ආයතනයකට බලෙන් ලබාදී නැති බවත්, ඕනෑම අවස්ථාවක එය ඉවත්කර ගැනීමට හැකි බවත් සමස්ත ලංකා ජමයිතුල් උලමා සභාවේ හලාල් අංශ ප්රධානී මුල්ෆික් මුලාෆර් මව්ලවිවරයා පැවැසීය.
හෙතෙම එසේ පැවසුවේ ඊයේ (7 ) කොළඹ පැවැති ප්රවෘත්ති සාකච්ඡාවකදීය.
මෙහිදී අදහස් දක්වමින් මුල්ෆික් මුලාෆර් මව්ලවිවරයා තවදුරටත් මෙසේ පැවැසීය.
'' අපි කාටවත් කියලා නැහැ හලාල් ලේබලය ගන්න කියලා. අපි කාටවත් හලාල් ලේබල බලෙන් දීලත් නැහැ. මේ රටේ නිෂ්පාදන, ව්යාපාරික ආයතන අපි ළඟට ඇවිත් අපෙන් ඉල්ලීමක් කළා ඒ අයගේ භාණ්ඩවලට හලාල් සහතිකය අවශ්යයි කියලා.
ඒ අනුව හලාල් ලේබලය දීමට සුදුසු නිෂ්පාදන පිළිබඳව අපේ කණ්ඩායමක් ගිහින් පරීක්ෂණ කරලා හලාල් ලේබලය ආයතන 200 කට පමණ දීලා තියෙනවා. ඕනෑම කෙනෙකුට මේක අයින් කරගන්න බැරි කමක් නැහැ. අපේ කිසිම බලපෑමක් නැහැ. එසේම මේ වන විට බැංකු හෝටල් ආදිය ද හලාල් සහතිකය සඳහා ඉල්ලීම් කර තිබෙන බවද එම මව්ලවිවරයා සඳහන් කළේය.
මොහොමඩ් මන්සුර් අහමඩ් මව්ලවිවරයා ද මෙහිදී අදහස් දක්වමින් පැවැසුවේ ජාතිවාදී අර්බුදවලින් තොරව සාමකාමීව ජීවත්වීමට සියලු ජාතීන්ට හැකිවේවා යන්නයි.
මුස්ලිම්වරු පල්ලි හදන්නේ රට අල්ලන්න නොවේ යෑයි සමස්ත ලංකා ජමයිතුල් උලමා සභාවේ මාධ්ය අංශයේ ප්රධානී ෆාදිල් ෆාරුක් මව්ලවිවරයා පැවැසීය.
බෞද්ධයින්ට පන්සල් සේම මුස්ලිම්වරුන්ට පල්ලියක් සාදා ගැනීම අතිශයින්ම වැදගත් වෙනවා යෑයිද හෙතෙම පැවැසීය.
වැරදි දේවල් උගන්වන වැරදි දේවල් සිදුවන සමාජයෙන් මුස්ලිම් ප්රජාව බේරා ගැනීම සඳහා පල්ලි අත්යවශ්ය බවත්, මුස්ලිම් පල්ලි තැනීම සිදු කෙරෙන්නේ නිත්යානුකූලව බවත් එම මව්ලවිවරයා සඳහන් කළේය.
මේ රටේ පල්ලි වැඩි නම් ඒ පිළිබඳ නීතියක් ගෙන එන ලෙස රජයෙන් ඉල්ලා සිටින බවද හෙතෙම පැවැසීය.
සාම්ප්රදායික මුස්ලිම්වරු හා අන්තවාදී මුස්ලිම්වරු යනුවෙන් බෙදීමක් මේ රටේ මුස්ලිම්වරු අතර නැති බවද සියලු මුස්ලිම්වරු එකම පිරිසක් වන බවද එම මව්ලවිවරයා කීවේය.
මේ රටේ මුස්ලිම්වරුන්ට මේ රටේ ජීවත්වීමේ අයිතියක් ඇති බවත්, වසර 1200 ක පමණ ඉතිහාසයේ පටන් එම අයිතිය ලැබී ඇති බවත් පැවසූ එම මව්ලවිවරයා ඔවුන්ගේ මව්බිම ශ්රී ලංකාව මිස සවුදි අරාබිය නොවන බවද අවධාරණය කළේය.
අතීතයේ සිටි සිද්ධි ලෙබ්බේ, මරික්කාර් (වාස්තු විද්යාඥ), අබ්දුල් කාදර් (නීතිඥ) යන අය මේ රටේ දියුණුවට වැඩ කළ ශේ්රෂ්ඨ මුස්ලිම්වරුන් බවද හෙතෙම පැවැසීය.
එහිදී අදහස් දැක්වූ උලමා සභාවේ මහනුවර දිස්ත්රික්කය භාර ෆසුල් රහුමාන් මව්ලවිවරයා මෙසෙද පැවැසීය.
''අපි බලන්නේ පොඩි පල්ලි විශාල කර ගැනීමටයි. විශාල පල්ලි තිබීම අපට ආඩම්බරයක්. රජයෙනුත් අපට සහාය ලැබෙනවා. මහනුවර මල්වතු විහාරය ආසන්නයේ වීරක්කම් මුස්ලිම් පල්ලිය හදන්න මේ රජය උදව් කළා. දළදා මාළිගාව, රුවන්වැලි සෑය, කළුතර බෝධිය, ශ්රී මහා බෝධිය වගේ අපටත් මීරක්කම් වගේ පල්ලි තියෙනවා. මේ රටේ ජහාත්, අල්කයිඩා ත්රස්තවාදී කල්ලි නැහැ. එහෙම ඉන්නවානම් ආරක්ෂක අමාත්යාංශය, බුද්ධි අංශ ඒ ගැන බලා ගනිවී. එල්ටීටීඊ ත්රස්තවාදය පැවැති කාලයේ මුස්ලිම්වරු සිංහල හමුදාව සමග එකතු වුණා. ජීවිත පිදුවා. තවදුරටත් ඒ වගේ සහයෝගයෙන් ජීවත් වෙමු කියලයි අපි කියන්නේ.''
http://sinhala.theindependent.lk/news/item/528-%E0%B7%84%E0%B6%BD%E0%B7%8F%E0%B6%BD%E0%B7%8A-%E0%B7%83%E0%B7%84%E0%B6%AD%E0%B7%92%E0%B6%9A%E0%B6%BA-%E0%B6%B6%E0%B6%BD%E0%B7%99%E0%B6%B1%E0%B7%8A-%E0%B6%BD%E0%B6%B6%E0%B7%8F%E0%B6%AF%E0%B7%93-%E0%B6%B1%E0%B7%90%E0%B7%84%E0%B7%90.html
No comments:
Post a Comment